ជំងឺភ្នែកនឿយហត់ដោយសារកុំព្យូទ័រអាចកើតមានបន្ទាប់ពីការសម្លឹងអេក្រង់ឧបករណ៏អេឡិចត្រូនិចដូចជា កុំព្យូទ័រ ទូរស័ព្ទដៃ អាយផេត រយៈពេលយូរដោយគ្មានការសំរាក។ រោគសញ្ញាដែលស្ដែងចេញរួមមាន ភ្នែកស្ងួត ចុកគ្រាប់ភ្នែក រោយគ្រាប់ភ្នែក ស្រវាំងភ្នែក ឈឺក្បាល និង រោយក។ទោះជាយ៉ាងណាក៏ដោយ យើងអាចមានមធ្យោបាយខ្លះៗដើម្បី កាត់បន្ថយរោគសញ្ញាទាំងនេះ។
ត្រូវព្រិចភ្នែកអោយបានទៀងទាត់:
ការព្រិចភ្នែកនឹងនាំមកនូវទឹកភ្នែកល្អយកមកផ្សើមកញ្ចក់ភ្នែក ដើម្បីកាត់បន្ថយភាពស្ងួតភ្នែក និង ក្រហាយភ្នែក។
ត្រូវដកភ្នែកចេញដើម្បីសម្លឹងមើលទៅឆ្ងាយ:
រាល់ការសម្លឹងអេក្រង់២០នាទី ត្រូវដកភ្នែកចេញដើម្បីសម្លឹងទៅឆ្ងាយរយះពេល២០វីនាទី ទើបធ្វើអោយសាច់ដុំប្រស្រីភ្នែកមានពេលសំរាក និង កាត់បន្ថយភាពរោយ។
សំរួលពន្លឺនៃអេក្រង់:
ការសំរួលពន្លឺបន្ទប់និងពន្លឺរបស់អេក្រង់បានត្រឹមត្រូវគឺមានសារៈសំខាន់យ៉ាងខ្លាំងក្នុងកាត់បន្ថយការចាំងភ្នែក។ ព្យាយាមកុំបើកភ្លើងចង្កៀងតំរង់ចំមុខ និង កុំអោយមានចំណាំងផ្លាតជះពីខាងក្រៅមកចំលើអេក្រង់ដែលធ្វើ អោយមានស្រមោលមើលមិនច្បាស់។
រក្សាចំងាយពីអេក្រង់:
ត្រូវរក្សាចំងាយយ៉ាងហោច៣០សង់ទីម៉ែត្រពីអេក្រង់ និង ដាក់ប្រហែល១០សង់ទីម៉ែត្រពីក្រោម នីវ៉ូភ្នែក។
ប្រើប្រាស់វ៉ែនតាការពារពន្លឺ:
គួរប្រើប្រាស់វ៉ែនតាការពារពន្លឺកុំព្យូទ័រដើម្បីកាត់បន្ថយចំណាំងផ្លាតពីអេក្រង់ និង កាត់បន្ថយភាពរោយភ្នែក។
ការប្រើប្រាស់ថ្នាំបន្តក់ជំនួយ:
ប្រសិនបើអការៈមិនធូរស្រាល អ្នកជំងឺអាចប្រើប្រាស់ថ្នាំបន្តក់ទឹកភ្នែកសិប្បនិម្មិត ដើមផ្ដល់សំណើម និង ជៀសវាសភាពស្ងួតភ្នែក។
